នៅថ្ងៃទី២៤ ខែកក្កដា ឆ្នាំ២០២០នេះ ឯកឧត្តម នាយឧត្តមសេនីយ៍ សាស្ត្រាចារ្យ សេង ផល្លី ប្រធានបណ្ឌិត្យសភានគរបាលកម្ពុជា បានអញ្ជើញជាអធិបតីក្នុងពិធីបើកសន្និបាតបូកសរុបលទ្ធផលនៃការអនុវត្តផែនការយុទ្ធសាស្រ្តរយៈពេល៥ឆ្នាំ (២០១៥-២០១៩) និងលើកទិសដៅការងារសម្រាប់រយៈពេល៥ឆ្នាំបន្ត ដោយមានការចូលរួមពីសំណាក់ថ្នាក់ដឹកនាំ គ្រូនគរបាលជាតិ និងមន្រ្តីក្រោមឱវាទចំនួនប្រមាណ៥០០នាក់ នៅបណ្ឌិត្យសភានគរបាលកម្ពុជា។

គួរបញ្ជាក់ជូនថា បណ្ឌិត្យសភានគរបាលកម្ពុជា ក្រោមការដឹកនាំរបស់ ឯកឧត្តម នាយឧត្តមសេនីយ៍ សាស្ត្រាចារ្យ សេង ផល្លី ក្នុងរយៈពេល៥ឆ្នាំកន្លងទៅ បានដាក់ចេញនិងអនុវត្តដោយជោគជ័យនូវកម្មវិធីកំណែទម្រង់របស់ខ្លួនលើការងារសំខាន់ៗទាក់ទងនឹងការដឹកនាំ-គ្រប់គ្រង ការអភិវឌ្ឍកម្មវិធីអប់រំ ការអភិវឌ្ឍសមត្ថភាពគ្រូនិងមន្រ្តី ការអភិវឌ្ឍធនធានរូបវន្តនិងធនធានសិក្សា ការស្រាវជ្រាវវិទ្យាសាស្រ្តនគរបាល កិច្ចសហការប្រតិបត្តិការអន្តរជាតិ និងការពង្រឹងវិន័យអ្នកសិក្សា។

ការធ្វើកំណែទម្រង់ខាងលើនេះ គឺដើម្បីឈានទៅសម្រេចបានជោគជ័យលើការអនុវត្តផែនការយុទ្ធសាស្ត្រ៥ឆ្នាំរបស់ខ្លួន ការកសាងវប្បធម៌គុណភាពនិងការលើកកម្ពស់សមត្ថភាពវិជ្ជាជីវៈកងកម្លាំងនគរបាលជាតិ ស្របតាមតម្រូវការរបស់សង្គមជាតិ ព្រមទាំងធានាបាននូវភាពម្ចាស់ការលើការអប់រំបណ្តុះបណ្តាលកងកម្លាំងនគរបាលជាតិក្នុងពេលអនាគត។

បន្ថែមលើនេះ ឯកឧត្តម សេង ផល្លី ក៏បានបង្ហាញអំពីវឌ្ឍនភាព សមិទ្ធផលធំៗនានារបស់បណ្ឌិត្យសភានាពេលបច្ចុប្បន្ន និងប្លង់ផែនការមេដែលជាគម្រោងអភិវឌ្ឍន៍បណ្ឌិត្យសភានគរបាលលកម្ពុជា លើផ្នែកហេដ្ឋារចនាសម្ព័ន្ធទាំងរឹងនិងទន់ ដើម្បីធានាបាននូវស្តង់ដាគុណភាពអប់រំបណ្ដុះបណ្ដាលកម្រិតខ្ពស់ មិនឱ្យចាញ់ស្ថាប័នបណ្ដុះបណ្ដាលនគរបាលនានាក្នុងក្របខណ្ឌអន្តរជាតិឡើយ។